Presentación de 'Viaxe á illa do Corvo'

O Parlamento de Galicia acolleu onte a presentación da edición en galego e portugués da obra Viaxe á illa do Corvo, Os Azores, 1924, de Raul Brandão, publicada dous anos despois da súa viaxe ao arquipélago dos Azores. Xesús Rábade Paredes encargouse da tradución ao galego e o académico Xesús Alonso Montero asina o estudo introdutorio, no que aborda os vínculos entre Raul Brandão e algúns escritores galegos coetáneos.

Un momento da presentación do libro, na que participaron o presidente da RAG, Víctor F. Freixanes, e o académico Xesús Alonso Montero. Fonte: Parlamento de Galicia


O presidente da RAG, Víctor F. Freixanes, e Xesús Alonso Montero participaron na presentación do volume no Pazo do Hórreo, no marco dunha visita da presidenta do lexislativo da rexión autónoma dos Azores á Cámara galega, María Luísa Pereira Luís.

Viaxe á illa do Corvo publicouse inicialmente en 1926 como parte dun volume máis amplo titulado As Ilhas Desconhecidas. Notas e Paisagens, no que Raul Brandão narra o seu periplo polo arquipélago luso. Esta obra foi unha contribución esencial no seu momento para o coñecemento dos Azores e hoxe segue a ser unha das imprescindibles da literatura de viaxes portuguesa.

A visita da presidenta da Cámara dos Azores prodúcese tras a presenza na súa rexión, en xullo de 2016, de representantes da RAG, o Parlamento de Galicia e a Xunta de Galicia co gallo da celebración do cuadraxésimo aniversario da autonomía do arquipélago. Daquela a delegación galega presentou a edición facsímile da "ediçao polyglota" de 1894 de "Zara", traducido a 48 linguas, entre elas o galego a través Curros Enríquez.