Luz Pozo Garza
Nada en Ribadeo en 1922 e membro de número da Academia desde 1996, a poeta Luz Pozo é autora de máis dunha ducia de obras que lle valeron numerosos recoñecementos, entre eles, o Premio da Crítica de poesía galega no ano 2009 por Deter o día cunha flor, ou o Premio Cultura Galega das Letras do 2013.
Never More
A Chuchi e a Cristina
Deixounos no silencio
No momento máis íntimo.
Entraba o Día das Letras Galegas
onde ela tiña un lugar reservado
despois de tanto amor á súa Terrra...
Escribía con paixón da súa cidade
das súas xentes
da inxusta sociedade en que vivía
Quixo arranxar o mundo
e as súas leis
facer un paradiso
dun inverno confuso e insalvable
daquela sociedade conformista
e transformalo todo
noutras mil e unha noites
da pura transparencia
esclarecida...
