'Corcubión', de Euxenio Montes

O poeta, narrador e ensaísta ourensán Euxenio Montes (1897-1982) foi membro, canda Manoel Antonio, Amado Carballo e outros, da chamada Xeración dos Novecentistas ou Vangardistas, segundo a periodización establecida por Carballo Calero.
Imaxe de Corcubión contra os anos corenta
Panorámica de Corcubión contra os anos corenta


Próximo cando novo ao círculo galeguista organizado arredor da revista Nós, Euxenio Montes habíase desprazar, andado o tempo, cara a posicións afíns ás da extrema dereita española, abandonando, no empezo dos anos trinta, o cultivo literario do galego. Secasí, entre 1922 e 1930, tirou do prelo na nosa lingua os libros de relatos O vello mariñeiro toma o sol e outros contos e Tres contos, ademais do poemario Versos a Tres Cás o Neto, publicado pola editora coruñesa Nós en 1930, do que tiramos o seguinte texto.

Corcubión

Non pide o croar dos zocos
rei, que pide mariñeiro.
Nos zocos latexa o pulso
de iauga e vento do inverno.
Finisterre. O corazón
ten unha anguria por remo.